Hensley Meulens, mihó konosí komo ‘BamBam’ ta e promé hungadó di beisbòl Yu di Kòrsou ku a hunga den Liga Grandi. Ora e a kumpli 18 aña di edat, e a kuminsá su karera internashonal i for di e momentu ei e a sa di konkistá un i tur su kurason. Hensley a traha 10 aña largu komo ‘batting coach’ di San Francisco Giants i e a gana ‘World Series’ tres biaha ku su tim. Esaki sigur ta un gran logro! Nos tabata tin un entrevista hopi ameno ku Hensley na Kòrsou, kaminda e ta bibando aktualmente. Nos a kombersá tokante su inisio den mundu di beisbòl, eksperiensianan ku hamas e lo lubidá i tambe su plannan pa futuro. Loke nos por bisa ta ku Hensley no ta sinta ketu i e ta kla pa ofresé proyektonan edukativo i konstruktivo na su dushi isla Kòrsou.
“Beisbòl semper tabata parti di mi bida. Komo hoben mi tabata hunga den e tim di Santa Rosa i ora mi a kumpli 15 aña mi a ser di ‘scout’ pa promé biaha. Dick Groch, ku tabata traha e tempu ei komo ‘scout’ pa New York Yankees a bishitá mi weganan tres aña tras di otro. Na 1989, ora mi a hasi 18 aña, mi a bandoná Kòrsou i mi a firma ku Yankees”, Hensley ta splika na komienso di e entrevista.
Awendia nos ta mira ku diferente hungadó di beisbòl di Kòrsou ta risibí kontrato pa hunga den timnan internashonal. Nos isla definitivamente tin un ingrediente mágiko, ku ta krea tur e talentonan di beisbòl ku ta hunga den Liga Grandi. “Antes tabata hopi diferente. Si mi kompará tempu di mi tempu ku awor, mi por bisa ku ami tabata un ‘late bloomer’. Nan a warda te ora mi tabata tin 18 aña pa firma ku mi. Awendia e hungadonan por firma for di ora nan tin 16 aña” e ta sigui splika.
Maske ku Kòrsou ta konta ku solamente 160 mil habitante, nos isla tin for di 1989 un total di 16 hungadó ku a partisipá den Liga Grandi, e kantidat mas haltu na mundu ‘per capita’. Awendia nos ta konta ku e talentonan manera; Ozzie Albies, Kenley Jansen, Didi Gregorius, Jonathan Schoop, Jurickson Profar i Andrelton Simmons. “Apesar di tur e sirkunstansianan, nos a yega leu den beisbòl. Nos mester para ketu riba e echo ku ‘coaching’ di beisbòl no ta optimal riba nos isla. Trabou di ‘coach’ di beisbòl ta trabou boluntario. Lástimamente e no ta ser konsiderá un trabou profeshonal. Pa e motibu aki nos a kuminsá 9 aña pasá ku e proyekto di Curaçao Baseball Week. Muchanan ku ta parti di timnan di beisbòl por partisipá na diferente lès i tambe nan lo siña di nos streanan lokal. Nos ta duna e muchanan aki tur e ingredientenan nesesario pa nan por tin mihó téknika. Tambe e ‘coachnan’ por asistí na diferente lès spesial tokante ‘coaching’. Asina nos ke duna bèk na nos pais. Tur aña Curaçao Baseball Week tabata un éksito rotundo! E muchanan ta bini ku yen di smak, e hungadonan ta hopi entusiasmá i e ‘coachnan’ ta habrí pa siña kos nobo. Esaki sigur ta duna nos mas forsa pa sigui traha riba e proyekto aki i tambe hasiele kada aña aun mas grandi. Pa motibu di e pandemia, nos mester a kanselá e evento, pero yanüari 2022 nos lo ta kla pa e siguiente edishon! Mi no por duna mas informashon, pero e Baseball Week aki lo ta algu ekstraordinario!” Hensley ta bisa ku un sonrisa grandi riba su kara.
Yunan di Kòrsou tin hopi rèspèt pa Hensley. No solamente pa e echo ku e ta e promé hungadó lokal ku a bai Liga Grandi, pero tambe paso e a gana ‘World Series’ tres biaha ku San Francisco Giants. “Ami ta un hende masha serio i trankil. Ora mi ta riba tereno, mi ta enfoká riba mi trabou. Mi no ta pensa ku ami ta e promé ku a habri kaminda ni tampoko mi ta pensa riba e premionan. Mi ta semper enfoká riba mi abilidatnan i riba e wega ku ta bai bini.”
Den 35 aña, Hensley a krea un nòmber importante den mundu di beisbòl. Pa 17 aña e tabata un hungadó i pa 18 aña e a traha komo ‘coach’. Na 2009 e a traha 1 aña pa e tim SF Giants triple A na Fresno i despues di esei a yega Liga Grandi komo ‘batting coach’ na 2010. E a traha 8 aña pa San Francisco Giants komo ‘batting coach’ i 2 aña komo ‘bench coach’. Tambe e a traha 1 aña ku New York Mets. Esei kemen ku 11 aña e a traha komo un ‘coach’ di Liga Grandi. Esaki ta algu úniko den beisbòl!
Despues ku e a traha pa Giants, e a akseptá e oferta pa traha komo bench coach pa e manager di Mets Carlos Beltran. Pero Mets a retirá Beltran prome ku e temporada a kuminsá. Hensley e ora a kai bou di maneho di manager Luis Rojas, pero e no a ser invitá pa bin bèk den 2021. Pa e motibu aki Hensley ta bibando na Kòrsou aktualmente, trahando riba proyektonan interesante pa nos komunidat. “Banda di Baseball Week, mi tim i ami ta trahando hopi duru riba konstrukshon di un sentro di deporte i entretenimentu na un sentro komersial lokal. Esaki no ta solamente pa hungadonan di beisbòl, pero tambe tur fanatiko di deporte ta bon biní pa pasa un ratu agradabel na e sentro. Tambe nan por siña tur e téknikanan di beisbòl den un ambiente moderno ku aparatonan sofistiká. Nos meta ta pa krea inovashon yudando nos deportistanan pa haña mihó resultado i tambe promové partisipashon den deporte. Tambe nos ta trahando riba e tereno na Santa Rosa ku lo bira un proyekto pa komunidat. Pa motibu di e pandemia, e proseso di kùr a tarda, pero nos ta spera ku pronto nos por presentá e proyekto aki. Tur mucha ta bai tin e oportunidat pa hunga beisbòl i sòftbòl riba e tereno. Skolnan i sentronan di bario tambe por hasi uso di esaki. E tereno ta pa nos komunidat. Manera bo mes ta mira, tin diferente proyekto ku nos ta trahando ariba. Nos ta trahando duru i nos ta tumando nos tempu pa por presentá tur kos manera mester ta.”
Pa Hensley tin diferente momentu den su karera di beisbòl ku nunka mas e lo lubidá. E promé ta na 1989 ora e a drenta Liga Grandi. E di dos ta momentu ku e a partisipá na Olimpiada; na 2000 komo hungadó i na 2004 komo ‘coach’. Dimes e tres biahanan ku e a gana ‘World Series’ pa semper lo keda grabá den su memoria i tambe e echo ku e tabata den ‘International League Hall of Fame (Triple-A)’. Logronan sumamente importante pa Hensley. Nos ta sumamente orguyoso ku tur su logronan i tambe ku pa semper a karga Kòrsou ku asina hopi amor i entusiasmo. Awor ta momentu pa kuminsá un kapítulo nobo di bida i den esaki nos ta kla tambe pa dune e apoyo ku e meresé.
