Liemarvin Bonevacia ta un ehèmpel di determinashon. E atleta di 32 aña di edat ku a nanse i krese na Kòrsou, a kana un kaminda largu pa por tin e karera eksitoso ku e tin aktualmente. Loke a kuminsá manera un hòbi, a bira su karera profeshonal. Su promé kompetensia internashonal tabata na edat di 22 aña i no tabata nada mas ni nada menos ku na Weganan Olímpiko na Londres. Logronan grandi semper ta bini ku desafionan. Den transkurso di añanan, Liemarvin a pasa den hopi momentu difísil. E a biba na diferente pais, e a pèrdè kontratonan importante i kasi e a legumai tur kos. Danki Dios e no a hasi esaki. E yegada di su beibi a dune èkstra motivashon pa sigui pusha. Awendia ku hopi orguyo e por bisa ku e ta den tòp, kibrando rèkert mundial ku 45.99 den 400 meter. Aworaki e ta enfoká riba Weganan Olímpiko na Tokio kaminda e lo partisipá bou di bandera hulandes. No solamente Hulanda, pero tambe su isla natal Kòrsou ta ansioso pa su partisipashon. E atleta aki ta hopi sosial i e tin hopi karisma. E ta kla pa pronto duna nos tur un bon presentashon!
“Hopi atleta ta bisa ku nan a kuminsá kore na un edat hopi yòn. Serka mi esaki no ta e kaso. Ami semper tabata fasiná ku otro deporte manera vòli, futbòl i asta mi tabata hunga den komedia. Ta mi ruman ta esun ku tabata hasi atletismo. Un dia mi tabata sintá na SDK ta wak e kore anto mi a pensa ku esaki tambe ta algu ku mi por hasi sin sa kiko tur por ta sperami. Tambe mi mester bisa ku mi tanchi Soraima Martha tabata un gran koredó i e a representá Antias den kareda di 200 meter na Weganan Olímpiko na 1984. Atletismo sigur ta kore den mi sanger. Aktualmente mi no por imaginá mi bida sin dje!” Liemarvin ta bisa na prinsipio di nos entrevista via Zoom.
Liemarvin a kuminsá kore ku 17 aña, loke ta ser konsiderá un edat “bieu” den e mundu di atletismo. “Ora bo kuminsá na un edat mas avansá, bo mester ta habrí pa siña i tambe bo mester tin hopi pasenshi. Ami semper a bisa mi ta un hòmber bendishoná. Mi a kuminsá ku 17 aña i ku 19 aña mi a haña un beka na Puerto Rico. Ora mi tabata tin 22 aña, mi a bai mi promé kompetensia internashonal ku ta Weganan Olímpiko na Londres. Ora mi pone un meta mi dilanti, mi ta traha duru pa logré” e ta splika.
Na 2017 tabata tin un malentendimentu ku e tim na Puerto Rico i asina Liemarvin a disidí sera e kapítulo aki. “Ora mi wak bèk na 2018 i 2019, mi mester bisa ku e añanan aki tabata esnan mas difísil di mi karera. Na 2018 mi tabata tin hopi leshon i na 2019 mi tabata biba un bida ku no tabata benefisiá mi karera. Mi tabata kier a gosa i disfrutá. Mi tabata kansá di e estilo di bida ku mi tabata tin for di mi 19 aña. E momentu ei tambe mi tabata tin un kontrato ku Nike ku no a ser alargá. Mi tabata biba di mi sen di spar. No tabata un temporada fásil pero e momentunan difísil aki sigur a formami den e persona ku mi ta awor i a hasimi aun mas fuerte pa futuro” Liemarvin ta sigui bisa. Promé ku e atleta a yega na e añanan difísil aki, su karera tabata den tòp. E a kibra rèkert hulandes, e a sali di 3 den Oropa i e tabata number 11 di mundu. E a logra asina hopi den e mundu di atletismo den un tempu asina kortiku. Pa ironia di bida, den 2019, e a sinti ku e no tabata tin mas meta pa logra. “Mi no tabata disfrutá mas di e deporte. Mi tabata den mi comfort zone i mi a asta pensa pa retirá. Pero, bida a dunami un chèns mas….Ainda mi tabata tin bon kontakto ku mi coach na Puerto Rico i huntu nos a bai Bahrain pa mi por a traha riba mi mes. E biahe aki a habri mi wowo. Mi a primintí mi mes ku mi lo disfrutá kada dia di e deporte aki i mi a kuminsá invertí den mi mes tambe. Esaki sigur a yuda, paso na Diamond League na Doha mi a yega na e nivel di mas haltu. Tabata un kombinashon di diferente faktor i e tempu tabata perfekto. Na e momentu ei e tim di Hulanda a yamami pa mi kore pa nan i pa mi ta 100% dediká na esaki. Mesora mi a bisa sí!” e ta splika.
Problemanan semper ta bira e mihó lèsnan di bida. Esaki ta hasibo mas fuerte i ta dunabo forsa pa loke ta bini den futuro. Esaki tambe ta e kaso di Liemarvin. Den 2021 Liemarvin a sa di kibra e rèkert Hulandes, e ta un kampion europeo i e ta na posishon number 1 di mundu. Tambe e a haña Puma komo spònser, un marka Alemán ku ta bende sapatu, paña i aksesorio deportivo. “Awor ku mi tin 32 aña di edat, mi por bisa ku mi ta un atleta eksitoso paso semper mi a perseverá. Mi ta hasi esaki pa mi famia i pa mi mes. Mi famia ta mi tur kos. Mi ta apresiá nan amor i nan apoyo. Esaki ta nifiká tur kos pa mi” Liemarvin ta bisa.
Na momentu ku nos tabata hasi e entrevista aki, ainda Liemarvin tabata na Hulanda, djies un par di dia promé ku e subi avion pa bai Tokio. “Aktualmente nos tim di atleta ta sigui un jetlag protocol, lo ke ta nifiká ku nos mester drumi mas tempran pa por drenta den e ora di Hapon. Aworaki e diferensia ta 7 ora i pa kada ora di diferensia, e kurpa mester di 24 ora pa por drenta den su ritmo normal. Mi ta hopi eksitá i entusiasmá pa loke ta bai bini. E aña aki Weganan Olímpiko lo ta kompletamente diferente pa motibu di e pandemia. No ta bai tin públiko pero ami ta bai ta enfoká pa duna mi públiko ku ta na kas klabá dilanti televishon, un bon show. Mi lo disfrutá di e momentunan aki manera ta e último!”
