Hainley Statia no ta un nòmber deskonosí den mundu di beisbol. E beisbolista di 35 aña di edat tabata forma parti di Liga Menor i a gana hopi eksperiensia balioso komo coach di Liga Menor di Milwaukee Brewers i tambe komo infield coordinatordi Los Angeles Angels. Maske e no a yega Grandes Ligas, e a krea un curriculum impreshonante ku meresé ta den spòtlait. Den un entrevista ameno ku a dura 2 ora, Hainley a konta nos tokante su amor pa beisbol, leshonnan ku a strobé logra su meta i tambe e trabou ku e ta hasiendo aktualmente den nos tim nashonal di beisbol. Ora bo kombersá ku Hainley, bo ta realisá ku tur kos ku pasa den bida tin un propósito. Kada eksperiensia di bida ta hasi nos fuerte, basta nos baloré i siña for di dje.
“Mi a kuminsá hunga beisbol ku mi 4 aña. Mi tata ta e persona ku a introdusimi na e deporte aki i despues mi wela tabata hibami vèlt tur dia. E tabata keda ku mi te ora nos kaba trein. Mi a krese ku mi wela, e tabata tur kos pa mi. Kada bes ku mi kòrda bèk e momentunan aki, mi ta kòrda ku semper mi tabata tin su apoyo” Hainley a bisa na komienso di e entrevista. Na e edat di 16 aña, Hainley a risibí e oportunidat pa firma un kontrato internashonal. E úniko eksigensia tabata ku e mester a bai hunga bala na Venezuela òf Repúblika Dominikana. Maske e tabata sumamente yòn, e tabata hopi talentoso i e tabata sa kaba ku e kier a haña stabilidat den su karera i e a disidí pa no akseptá e oferta. “Hopi hungadó di beisbol tin un bida sin stabilidat i nan no sa kiko spera di futuro. Den e temporada ei, ami tabata ke algu sigur den mi bida. Mi kier a firma i hunga bala na Merka, pero mi tabata ke tin e prosedura pa haña visa reglá. Pa e motibu aki mi a bai studia Merka” e ta splika. Ora Hainley tabata tin 17 aña, e a bai studia na Trinity Christian Academy na Boynton Beach, Florida. E tabata e promé hungadó di Kòrsou ku a bai Merka pa studia i hunga beisbol. E a keda na kas di un famia, ku te dia di awe e ta kòrda ku masha kariño i apresio.
Hainley a kuminsa krese komo beisbolista. Despues di a hunga high school baseball pa un aña, Hainley a ser di draftden e di 9 round di Los Angeles Angels. E ta e prome hungadó di Kòrsou ku a ser di draft for di high school. Hainley su soño a bira realidat na momentu ku e a firma e kontrato i e a kuminsá su karera komo beisbolista profeshonal na Merka. E tabata forma parti di Angels entre 2004 i 2010. E tabata bai bini entre Single A, Double A i Triple A. Na 2010 e a bira agente liber i e mesun aña e a firma ku Milwaukee Brewers. Na 2006 Hainley tabata forma parti di e tim nashonal di Hulanda na World Baseball Classic i te ku 2015 e a hunga den mayoria kampionato ku e tim aki. Na 2014 Hainley a ser aserká pa traha komo coach pa Milwaukee Brewers, pero e a sinti ku e no tabata kla pa e reto aki ainda. E kier a sigui enfoká riba su karera komo hungadó di beisbol.
“Bida di un hungadó di beisbol di Liga Menor por ta hopi duru. E salario no ta hopi i esaki ta hasi e bida aun mas difísil. Bo por skohe pa keda den un kas di un famia ku e tim ta regla òf bo por hür un apartamento ku e otro hungadonan. Mi ta kòrda ku mi a bai na kas di un famia i tabata tin kabei di pushi tur kaminda. Mesora mi a bisa nò!” Hainley ta bisa hariendo. E momentu ei e a disidí di hür un apartamento ku otro hungadonan. Nan a kumpra kolchon di airu ya asina tur hende por a pas den e kas. “Dor ku mi a forma parti di e tim nashonal di Hulanda, esaki a bin yudami hopi paso mi a risibí un A-status. Esaki ta enserá ku bo ta risibí salario di Hulanda i finansieramente esaki a hasi mi bida un tiki mas fásil” e ta sigui splika.
“Mi a pasa den hopi kos inesperá. Mi a haña hopi leshon ku a strobami den mi karera. Na 2008 mi a haña un leshon grave na mi hamstring. Dor di esaki mi mester a bai den proseso di rehabilitashon pa mas ku un aña. Na 2010, mi a lastimá mi èlebogi mi mester a hasi un operashon ‘Tommy John’ i na 2011 mi a kibra mi ènkel ora mi a slep drentando di dos base den e ultimo wega di temporada. E insidentenan aki definitivamente a strobami logra mi meta ku ta bira hungadó di Grandes Ligas. Ironia di bida ta ku kada un di e leshonnan aki a sosodè nèt prome ku mi lo mester a djòin un tim di Grandes Ligas. Djies un ehèmpel, dia mi a haña leshon na mi èlebog, mi tabata den Triple A i e dia despues ku e kos ei a pasa, e shortstop tambe a risibí leshon i ami tabata e hungadó ku lo mester a remplasé den Grandes Ligas. Lamentablemente esaki no tabata e kaso. Ora ami hunga beisbol, mi ta duna tur kos riba vèlt, mi ta hunga ku hopi pashon i mi ta hunga brutu. Dor di e manera ku mi ta hunga bala, ta inevitabel pa no sali leshoná. Keremi, mi a pasa dor di hopi dolor!” Hainley ta konta.
Tur kos ku pasa tin su motibu i ser un hungadó den Grandes Ligas no tabata pe. Pero, despues di kada desepshon, bo ta haña forsa pa sigui. “Tabata difísil pa akseptá mi realidat pero aworaki mi ta kontentu ku e kosnan a pasa asina. E ta zona kisas straño pa loke mi ta bai bisa, pero mi ta sinti ku mi a ser protehá dor di no yega Grandes Ligas. E manera kon mi tabata biba mi bida e tempu ei, lo tabata sigur un problema pa mi karera den Grandes Ligas” e ta konta.
Despues di a pasa den hopi desapunto, Hainley a realisá ku tabata ora pa bira coach. E a ser aserká varios biaha pa hasi esaki, pero den e temporada ei e tabata enfoká riba su karera komo hungadó. Na 2015 e a kuminsá komo player-coach pa Brewers. Na 2016 e a disidí bai un stap mas leu dor di coach full time i traha komo hitting coach pa Brewers riba Rookie Level. Dia 26 di yanüari 2017, Hainley a keda introdusí komo hitting coach di Klase A Liga Menor afiliá ku Milwaukee Brewers.Despues di algun temporada ku Brewers, e por bisa ku e a haña e trabou di su soño na 2018 komo infield coordinator pa Los Angeles Angels. E trabou aki e ta hasi te dia di awe. “Ora bo ta di un isla multi kultural manera Kòrsou, hopi porta por habri pa bo. Mi a lanta aki, siñando diferente idioma. Esaki a pone ku mi por a krea un bon relashon ku e hungadonan di otro paisnan spesialmente esnan di Latinoamérika, paso mi ta dominá nan idioma. Komuniká ku nan den nan idioma no ta solamente bon pa nan, pero tambe ta hasi nos tim aun mas fuerte. Tambe mi mester bisa ku mi a traha ku shortstop Andrelton Simmons na momentu ku e tabata den Angels. Nos por a komuniká ku otro den nos idioma Papiamentu. E kos ei sigur a hasimi hopi orguyoso!”
Pa 11 aña Hainley Stata a forma parti di e tim nashonal di beisbol di Hulanda. Semper tabata su meta pa por a duna bèk na su komunidat i traha riba un tim nashonal di Kòrsou. E kier a instruí e hoben beisbolistanan pa nan traha duru i bira e miho vershon di nan mes. “Resientemente nos a tuma nota kon nos tim nashonal di futbol a haña fama i apresio, no solamente lokalmente pero tambe internashonalmente. Esaki a inspirami pa hasi meskos den beisbol. Apesar di tur e trabou ku mi tin na Merka, ta hopi importante pa mi pa traha pa mi isla i duna bèk na mi komunidat. Mi a krea un agènda ku ta yudami hasi tur dos trabou. Pa ser coach di nos tim di beisbol ta un reto grandi. Mi a kuminsá di abou bai ariba, trahando riba disiplina i perseveransia. E kos aki no ta un hòbi. Mi ke nos tim krese i bira eksitoso. Hasiendo e trabou di coach na Merka i tambe guia e hungadonan lokal sigur a yudami krese komo persona i komo profeshonal. Nada ta pasa pòrnada. Mi no a bira un hungadó di Grandes Ligas pero bida a regalami otro oportunidatnan balioso. Mi ta kaminda mi mester ta i mi ta hopi agradesí.”
