Ora bo tende e nòmber Churandy Martina (37) mesora bo ta pensa riba determinashon, trabou duru i positivismo. Churandy ta konosí pa ta un gran atleta i tambe pa su ‘one million dollar smile’ ku a lage gana e título di ‘meest positieve Nederlander’. Churandy a nanse na Kòrsou, pero e a biba hopi tempu na Merka i na Hulanda. E a partisipá sinku biaha na weganan olímpiko. Dos biaha e a representá Antillas (2004 i 2008) i tres biaha e a representá Hulanda. Aparte ku Churandy ta un atleta renombrá, pa hopi aña e a bira un ehèmpel den nos komunidat. Nos tabata tin e oportunidat pa kombersá ku Churandy. Nos a papia tokante e inisio di su karera, su eksperiensia na weganan olímpiko na Beijing na 2008 i tambe su plannan pa futuro. E a duna nos un ñapa masha great mes!
“Ora mi tabata den 5de klas, mi a partisipá den ‘Vijfkamp’ i asina mi a kuminsá gusta hunga vòli i hasi atletismo. Mi a enfoká riba tur dos deporte pero despues mi a skohe pa atletismo, paso ku e deporte aki mi por a partisipá den kampionatonan internashonal. Mi kier a siña mas dor di bai afó i krea mas eksperiensia” Churandy ta bisa na prinsipio di e entrevista.
Churandy a kuminsá su karera internashonal riba e nivel di hoben, logrando semifinal di 100 meter na 1999 World Youth Championships in Athletics. Ora e avansá na e nivel di junior, e a kore na World Junior Championships in Athletics den 2000 i 2002. E a risibí su promé medaya di oro den 100 meter na 2002 South American Games na Belém, Brasil. Despues di a representá Antiya Hulandes na diferente kampionato, Churandy a partisipá na su promé weganan olímpiko na 2004. Ku hopi orguyo e a karga bandera di nos islanan i for di e momentu ei su karera a krese den gran forma.
E a partisipá na diferente kompetensia, hañando eksperiensianan balioso i tambe e a sa di pone Antiya Hulandes riba mapa mundial. Na 2008 e karera di Churandy a tuma un paso sumamente inesperá na momentu ku e a partisipá na weganan olímpiko na Beijing, China. Churandy a keda na di dos lugá den 200 meter, nèt tras di Usain Bolt, ku un tempu di 19.82 s. Esaki por tabata un rèkert pa nos islanan. Na final di e kompetensia, Kòrsou tabata fiesta den gran forma. Tabata un logro asina grandi pa nos pueblo! Pero e selebrashon a dura kòrtiku, paso un ora despues Churandy a keda deskualifiká dor di a trapa riba liña.
E atleta amerikano Wallece Spearmon, ku a yega na di tres lugá, a keda deskualifiká algun minüt despues ku e kareda a kaba, paso e a trapa riba e liña paden durante e kompetensia. E coachnan amerikano a apelá e desishon i na momentu ku nan a bai wak e video bèk, nan a mira ku Churandy a kometé e mesun fayo. “E momentu aki sigur ta unu ku hamas mi lo lubidá. Mi tabata rabiá, desapuntá….Mi ta respetá tur regla, pero tin asina hopi kos ku no ta kuadra den e situashon aki. Mi ta tume mane un lès di bida. Beijing 2008 a hasimi mas fuerte, e a hasimi mas skèrpi i semper mi a keda pusha pa dilanti” e ta sigui bisa. Despues di disolushon di Antiya Hulandes, Churandy a representá Hulanda na diferente kompetensia. E tabata biba na Merka e temporada ey, pero pa motibu di e trainingnan e mester a muda pa Hulanda. Aparte ku e tabata tin bon resultado na e kompetensianan, Churandy a sa di konkistá kurason di su fanátikonan hulandes. Su aksènt partikular i su alegría kontagioso a habri portanan interesante pe, manera propagandanan na televishon. Tambe pa dos biaha e a gana e título di ‘meest positieve Nederlander’ ( e hulandes mas positivo). Su grupo di fanátiko ta enorme, no solamente na Hulanda, pero tambe na Kòrsou i islanan ruman.
Aña pasá Churandy a partisipá pa di 5 biaha na weganan olímpiko. Esaki ta algu sumamente úniko! Ku hopi orguyo e ta splika e sensashon ku e tabata tin na momentu ku e a pasa den e eksperiensia aki ku otro atletanan di Kòrsou, manera entre otro Liemarvin Bonevacia, Terrence Agard i Hensley Paulina. “Pa Kòrsou esaki sigur tabata un tremendo promoshon. Nos a karga bandera hulandes pero e echo ku nos ta bini di un isla asina chikí ta nifiká asina hopi!” Churandy ta menshoná.
Rumornan a kore ku esaki por tabata e último weganan olímpiko pa Churandy. “Bo no sa nunka…mi tin 37 aña di edat, mi ta kere mi tin e forsa pa sigui. Mientras nochi ‘un sera, kareda di biná no ta kaba!” e ta bisa ku un sonrisa. Algun dia despues di e entrevista aki, nos a lesa den korant ku e lo enfoká riba su di 6 partisipashon na weganan olímpiko. Churandy definitivamente ta un ehèmpel ku éksito no konosé edat i no tin límite pa logra bo soñonan.th participation at the Olympics. He is definitely an example that there is no age for success and there is no limit to what a man can achieve.
Aña pasá tabata spesial pa otro motibu tambe, paso Churandy a presentá su dokumentario ‘Churandy – De Eindsprint produsí pa Thakai Doran. “Ku e dokumentario aki mi kier a mustra spesialmente nos hobennan ku trabou duru ta paga. Nan ta nos futuro i nan mester kere den nan mes pa por logra nan meta. Mi a haña asina bon reakshon ku e dokumentario aki! Mi ta kontentu ku hopi hoben por a wak e tambe i mi ta spera e por inspirá nan den nan desaroyo” e ta sigui bisa.
Na e momentu aki Churandy ta enfoká riba diferente kampionato manera World Championships na Merka i European Championships na Munchen. “Honestamente, hopi kos a kambia dor di e pandemia. E sekreto ta pa kambia bo pensamentu i sigui pusha apesar di tur kos. Semper mi ta kontentu paso mi ta agradesí pa bida. Nos tur ta pasa den momentunan difísil pero bo por skohe tur dia di tin un aktitut positivo! Esaki sigur ta algu ku mi ke siña e atletanan mas yòn. Trabou duru ta paga!” Churandy ta splika.
Banda di su karera komo atleta, Churandy a deskubrí otro pashon ku ta gòlf. Nos a ripará ku varios atleta di Kòrsou a kuminsá hunga gòlf i tambe ta partisipá na diferente kompetensia. “Ami gusta hunga gòlf! Ora mi ta na Kòrsou, mi ta bai relahá riba vèlt!” e ta bisa ku un smile.
Ora bo papia ku Churandy bo ta realisá un biaha mas ku un aktitut positivo ta tur kos den e mundu aki. Churandy, danki pa semper representá nos isla den gran forma, unda ku bo bai!
