Jair Jurrjens (35) ta un nòmber konosí den mundu di beisbòl. Komo un pitcher profeshonal, e a sa di krea un kuríkulo interesante. Ta importante menshoná ku e ta e promé pitcher di Reino Hulandes ku a hunga den Liga Grandi. Jurrjens a nanse na Kòrsou i e a hunga den Liga Grandi ku diferente tim di beisbòl manera Detroit Tigers, Atlanta braves, Baltimore Orioles i Colorado Rockies. E a bira un ehèmpel pa hopi di nos hobennan ku ta práktika e deporte aki. Island Sportlight tabata tin un entrevista interesante ku Jurrjens ku aktualmente ta biba na Atlanta. E a konta nos kon e a drenta den e mundu fasinante di beisbòl, rekuerdonan ku hamas e lo lubidá i tambe kon e ta eksperensiá beisbòl aktualmente. Bida ta kargá ku sorpresa i ta dal hopi buèlta!
“Maske mi a krea un nòmber den beisbòl, mi mester bisa ku ainda mi mester kustumbrá ku e beisbòl moderno, ya ku e deporte aki no ta meskos manera antes. Den transkurso di añanan, mi bida a dal diferente buèlta interesante. Mi a sufri hopi leshon, mi a haña Covid-19, di kual ainda mi ta rekuperando. Pues e tempu aki mi ta usando pa traha riba mi mes, pa reflehá i tambe traha riba mi plannnan pa futuro” Jurrjens ta bisa na prinsipio di e entrevista.
Komo mucha, Jurrjens tabata forma parti di e tim di beisbòl di Marchena. Ora e a kumpli 17 aña, e a ser invitá pa partisipá na diferente try outs na Lakeland, Florida. Na e momentu ei, e tabata un infielder, pero e por a picha tambe. E scoutnan a keda fasiná ku su téknika di picheo i dor di e resultado positivo aki, Jurrjens por a firma mesora komo un ‘undrafted free agent’ ku Detroit Tigers. “For di prinsipio mi tabata sa ku mi kier a hunga beisbòl na Merka, enbes di bai Santo Domingo òf Venezuela. Hopi talent yòn ora nan ser di scout na Kòrsou, nan ta bai e paisnan aki pa gana mas eksperensia prome ku start un karera profeshonal na Merka. Esaki sigur por ta un paso hopi edukativo, pero tambe e por ta difísil ku hopi strès. Ora mi a drenta e tim di Liga Menor, mi a realisá ku mi tabata tin hopi suerte ku mi por a keda na un campus, kaminda mi a ser guiá pa otro hungadonan i tambe e personanan ku mi tabata kompartí kamber ku nan. Tabata un kapítulo nobo di mi bida, pues esaki sigur a yudami. Otro hungadonan di beisbòl, ku tabata forma parti di otro timnan, mester a pasa oras pa kue bus, pa asina bai vèlt. Mi tabata hopi dediká pa hasi mi bèst i duna tur ku mi tabata por” e ta bisa.
Despues di a hunga 3 temporada i mei den Liga Menor, na edat di 21 aña, Jurrjens a hasi su entrada den Liga Mayor ku Detroit Tigers den 2017. E ta e prome pitcher di Kòrsou ku a yega den Liga Mayor. Na final di temporada di 2007, e a pasa pa Atlanta Braves i prome ku e temporada di 2008, e a sali na di tres luga komo e miho prospekto di su tim. Su resultadonan tabata sublime i komo un hungadó di beisbòl di solamente 22 aña, Jurrjens tabata destiná pa ta eksitoso den e deporte aki. Den 2009 e tabata tin su miho temporada kaminda e a yega na di tres lugá den Liga Nashonal ku 2.60 ERA. Despues di a sufri di leshonnan den 2010, Jurrjens a bin bèk duru den 2011. Apesar di esaki, su problemanan di salú a sigui molestié. Un leshon fuerte a pone ku e no por a hunga den prinsipio di temporada di 2012 i na e momentu ei Braves a mande den Liga Menor pa e por rekuperá su mes poko poko. Maske e a bai bèk Liga Grandi, e a keda sufri di e leshonnan i Braves a disidí pa no dune un kontrato. Na 2013 e a firma ku Baltimore Orioles pa un kontrato di 1 aña, pensando ku e por tin un karera eksitoso. Pero, e a hunga solamente dos biaha den e temporada ei. Despues di Detroit, Jurrjens a forma parti di Reds, Dodgers i Rockies, pero su salú tabata lage na kaya. Despues e a disidí bai hunga na China, Repúblika Dominikana, México i tambe e a representá Hulanda den World Baseball Classic den 2017. Apesar di esaki, Jurrjens no a picha mas den Liga Grandi for di 2014.
“Apesar di e eksperensianan aki, mi ta wak bèk riba algun momentu inolvidabel den mi karera. Semper mi lo keda kòrda mi promé wega. Mi tata no por tabata presente na Merka paso su pasaporte a kaduká. Nunka mas mi lo lubidá e momentu ku mi tata a sorprendemi den hotèl. Danki na Emily de Jongh-Elhage ku tabata Promé Minister e tempu ei, esaki por tabata posibel. Mi tata ta un di e personanan mas importante den mi bida. E a siñami pa traha duru i pa semper keda mi mes. Mi a siña hopi di dje, tambe di su perspektiva di bida” Jurrjens ta bisa.
Tin algun eksperensia amargo ku Jurrjens a pasa aden tambe. Dor di su sirugia, e mester a keda praktiká e deporte i pa e motibu aki e a disidí bin Kòrsou pa picha pa un tim lokal. “Na promé instante, mi tabata kontentu ku mi a bin kas bèk serka mi famia. Di otro banda, lamentablemente mi a pasa den un eksperensia amargo. Mi no a bin Kòrsou pa pretendé di ta e mihó, pero lamentablemente tabata tin un grupo grandi di fanátikonan di beisbòl ku a kritiká e echo ku mi a bin bèk kas. Fanátikonan rònt mundu por insultabo, pero e ta duel bo mas ora nan ta di bo mes país! Mi kier a duna bèk na mi komunidat, pero kosnan no a bai mane mi tabata ke” e ta splika.
Maske ainda Jurrjens ta risibiendo diferente oferta pa hunga winter ball na Venezuela, México i Repúblika Dominikana, aktualmente e ta rekuperando di Covid i no ta un opshon pa laga su famia na Atlanta. Jurrjens ta tata di un yu di 2 aña i su famia mester di dje. “Mi ta usa e tempu aki pa rekuperá kompletamente di Covid-19 i tambe pa ta fit. Tambe mi ta trahando komo empresario” Jurrjens ta sigui bisa.
Na e momentu aki, huntu ku Curt Smith i Randolph Oduber, Jurrjens a kuminsá ku un kompania ku yama ‘Dream Glove’, ku ta bende guante di beisbòl di tremendo kalidat. Promé ku e a kuminsá su karera komo empresario, e a usa e guante aki i e a keda fasiná. Asina e a aserká su amigo Curt pa e tambe forma parti di e tim aki. “Kisas ta zona cliché, pero mi ta kere den e poder di un komienso nobo. E oportunidatnan aki a habri porta interesante pa mi i a fasilitá mi kreatividat” e ta finalisá e entrevista.