Maske ku den transkurso di añanan e partisipashon den deporte di tiru a krese enormemente, tòg e deporte aki no ta haña sufisiente kobertura den prensa lokal. Deporte di tiru no ta mesun popular ku beisbòl òf futbòl, pero ta importante pa nos realisá ku nos isla tin e potensial pa krea mas atleta profeshonal den e deporte aki. Un di nos atletanan lokal ku ta akapará atenshon internashonal ta Philip Elhage. Philip a nanse i a krese na Kòrsou i na 2008 e a representá Antia Hulandes na Weganan Olímpiko na Beijing den e kompetensia di ‘Air Pistol’ riba distansia di 10 meter. E aña aki e lo representá Aruba na e Weganan Olímpiko na Tokyo, Hapón. E biaha aki Philip lo karga bandera di un otro pais, pero e ta hopi entusiasmá ku e reto aki i ta karga Kòrsou semper den su kurason.
Kon bin bo a drenta den deporte di tiru?
Deporte di tiru ta kore den mi benanan. Mi mayornan tin un laso hopi fuerte ku e deporte aki. Na Kòrsou ta konosí ku mi famia parti di tata ta den negoshi di arma, pero mi wela parti di mama tambe tabata praktika e deporte di tiru na Sint Maarten. Ami semper tabata fasiná ku e deporte aki, pero mi meta tabata semper pa pasa prèt. Na momentu ku mi a eksperensiá Weganan Olímpiko na Atenas, mi a bisa mi mes ku mi ke hiba e deporte aki na e siguiente nivel. Mi a pone komo meta pa partisipá na Weganan Olímpiko. Na 2008 mi soño a bira realidat i mi a representá Antia Hulandes na Beijing.
Konta nos un tiki di e deporte aki…
Deporte di tiru konosé tres disiplina; rifle, pistol i shotgun. Ku rifle i pistol e atleta ta tira riba diferente obheto ku ta stashoná den rango i ta usa e shotgun pa tira riba obhetonan ku ta move. Ora usa rifle i pistol, e atleta ta enfoká riba sírkulonan ku tin diferente punto. Tin diferente arma i tres sorto di distansia: 50m rifle riba distansia di 10 meter, air rifle riba distansia di 10 meter, rapid-fire pistol riba distansia di 25 meter i air pistol riba distansia di 10 meter. Ora ta tira ku shotgun, ta enfoká riba un obheto ku ta move, ku ta konosí komo clay target. Tin dos variedat di esaki: trap, obhetonan ta ser tirá den un tiru riba un distansia largu; i skeet, kaminda obhetonan ta ser tirá for di banda robes pa banda drechi. Na Tokyo, rifle riba distansia di 10 meter, air rifle riba distansia di 10 meter i clay trap lo ta parti di e kompetensia di hende muhé, di hende hòmber i di kompetensia kombiná. Maske ku ehersisio físiko ta importante den e deporte aki, ta rekerí pa tur atleta tin poder mental, paso un tiru so por resultá viktorioso!
Bo a nanse i krese na Kòrsou, pero bo lo representá Aruba na Weganan Olímpiko. Kon bo ta sinti pa ku esaki?
Dia 10 di òktober Antia Hulandes a stòp di eksistí i Kòrsou ku Sint Maarten a bira outónomo den Reino Hulandes. Antia Hulandes no por a partisipá mas na Weganan Olímpiko, pero e atletanan si por a partisipá bou di bandera hulandes. Kòrsou i Sint Maarten tampoko por partisipá komo ku nan no ta rekonosé na Nashonnan Uní. Esei ta un rekisito di International Olympic Committee. Pa por representá Hulanda na Weganan Olímpiko, tin basta kos pa tene na kuenta ku ne. Pa ami ta difísil pa kombiná esaki ku mi aktividatnan den mi bida diario. Na 2016 mi a ser aserká pa e direktor di Aruban Olympic Committee pa mi por a djòin e tim di Aruba. Mesora mi a bisa si i mi mester a pasa un proseso intenso di kualifikashon. Mi a logré i awor mi ta klá pa representá nos hermana isla na Tokyo. Maske mi no lo karga e bandera di mi pais, mi ta hopi agradesí na Aruba ku a brindami e gran oportunidat aki.
Pa kiko bo ta kere deporte di tiru no ta popular na nos isla?
Lamentablemente e deporte di tiru ta ser menospresiá, maske esaki ta hañando mas fama na Weganan Olímpiko. E bunita di e deporte aki ta ku tur hende por partisipá na dje. No tin distinshon di sekso ni edat i tin tiki regla ku ta importante pa sigui. E deporte aki ta tèst bo habilidat i nèrvio. Bo ta sali eksitoso ora bo sa kon keda trankil bou di tenshon. Mi tin sigur ku nos por atraé mas talento lokal den e deporte aki. Mi ta papia di talentonan ku nos por mira partisipá riba nivel haltu. Un di mi metanan ta pa siña hobennan tokante e deporte aki i tambe preparánan pa por bai Weganan Olímpiko.
Tokyo 2021 ta bo di dos eksperiensia na Weganan Olímpiko. Kon bo a eksperensiá e promé na Beijing?
Mi tabata asina entusiasmá! Mi a sintimi asina orguyoso di por a karga e bandera di Antia Hulandes den un stadion yen di hende. E dia despues di e seremonia di apertura mi mester a tira. Mi tabata duda si bai e seremonia, paso mi kier a sosegá pa mi por konsentrá bon e siguiente dia. Na final mi a disidí di tòg bai paso e eksperiensia aki ta algu úniko den bida. Mi ta hopi kontentu ku mi a hasi esaki. Tabata mi meta pa a yega Weganan Olímpiko i representá nos islanan. Mi a gosa ku mi a yega asina leu!
Kon bo ta preparando bo mes pa e Weganan Olímpiko?
Pronto mi ta sali pa México pa mi por trein ku mi coach pa tres siman. Despues di esei nos ta sali pa Tokyo. Antes mi tabata hopi nervioso ora mi mester kompetí internashonalmente. Den transkurso di ultimo añanan mi a siña kon atendé ku desepshonnan. Mi a traha riba mi mes i mi a siña konfia den mi mes i mi kapasidatnan. Mi ta bon prepará, mi sa unda mi ta pará i e 1 ora ku 15 minüt ku mi mester presentá, mi lo disfrutá tur ku tin.
Bo tin un mensahe pa pueblo di Kòrsou?
Si. Tin mas deporte ku beisbòl i futbòl. Tin otro deportenan ku no ta mashá konosí pero ku tambe ta interesante. Tin deportenan ku no ta haña e atenshon nesesario simplemente paso hende no ta komprondé nan. Kòrsou ta un isla talentoso; nos a demostrá mundu kaba ku nos ta kampion den beisbòl. Ta momentu pa nos pone lus riba deportenan ku no ta masha popular i tambe duna nos hobennan e oportunidat pa por krese den un tereno deskonosí. Nos mester siña tambe duna tur nos atletanan e aporte ku nan meresé.