Esports ta ser konsiderá komo e deporte ku a konosé mas kresementu na mundu. Na 2021, e merkado mundial di Esports tabata bal mas ku 1.08 biyon di dòlar, un 50% mas ku e aña anterior. Esports ta un industria ku un kresementu enorme i ku ta ofresé diferente opshon pa hasi karera. Hopi hende no ta para ketu na esaki. Esports ta konsistí di kompanianan di software i hardware ku ta desaroyá diferente teknología ku ta pone ku gamers profeshonal por hunga nan wega. Tambe e ta konsistí di kompanianan di telecom ku ta konektá personanan via internèt i di kompanianan ku ta enfoká riba cloud hosting i data centers. E industria aki ta inkluí kompanianan di diseño gráfiko, outornan profeshonal ku ta na enkargo di kontenido i produktornan ku ta hinka e escenanan di akshon den otro. Den e mundo aki mester hasi investigashon balioso den e ‘evento real’ ya asina e kompanianan di software por traha esaki na nan manera. Un ehèmpel ta e kompetensia di Formula 1 i tambe e kompanianan di outo ku ta determiná loke ta na moda den e industria aki. Kompanianan di Esports tambe ta traha ku kompanianan di marketing pa asina yega na hungadonan profeshonal di video games, konektá markanan ku e timnan, haña spònsòr pa tim i krea konsientisashon riba markanan. Maske ku Esports ta birando asina popular, tòg tin e idea robes pa loke ta trata e deporte aki. Lamentablemente ta eksistí e pensamentu ainda ku personanan ku ta hunga wega no por krea un karera eksitoso for di esaki. Ta importante enfoká ku Esports ta krea trabounan interesante i tambe oportunidatnan balioso.
Island Sportlight tabata tin un entrevista hopi interesante ku Jeff Macolonie i George Samander, e dos personanan tras di Fuego, e promé organisashon di Esports riba islanan ABC. E dos personanan aki ta un ehèmpel di profeshonalnan ku a sali for di nan zona di kòmfort pa asina sigui nan pashon i hasi nan soño realidat. Na e edat di 18 aña, Jeff Macolonie ya kaba tabata un hungadó di wega profeshonal di video games. E a krese den e industria aki i e a yega den e tòp 10 di e mihó hungadonan di Latino Amérika. Komo ku Jeff tabata hunga asina bon, e a ser aserká pa un organisashon di Esports di México i asina su bida a kambia drástikamente. “Mi ègt kier a hasi esaki! Mi kier a stòp ku skol i traha mi karera den video gaming. Despues di 6 luna mi por a konvensé mi mayornan pa mi stòp skol i hasi mi soñonan realidat. Mi a bai México i mi a forma parti di Brawl Esports, un Legends team di un liga Latinoamerikano. Despues di 1 aña mi a djòin Authority E-sports, ku tambe ta un Legends team di un liga Latinoamerikano. Mi bida a kambia por kompleto ora mi a yega México. Esports ta algu sumamente grandi na Latino Amérika. Tur kaminda tabata tin fanátikonan ta warda riba nos i nos ku ta hungadó a ser tratá manera artista! Mi a partisipá den diferente kompetensia di video gaming i mi a haña popularidat den e industria aki. Ta importante menshoná ku tur hungadó di video games i fanátikonan di e industria aki ta ser konektá via Twitch i tambe via otro medionan sosial. Twitch ta un plataforma ku ta enfoká riba Esports, promoviendo live streams pa asina por wak tur e kompetensianan ku tin di video games. Riba e plataforma aki e hungadonan por siña di otro tambe, por interkambiá informashon i e fanátikonan por tin kontakto ku otro. Ta di e manera aki mi a bira popular na México. E hendenan tabata rekonosemi dor di Twitch” Jeff ta splika.
Na un edat asina yòn, Jeff a haña un eksperiensia balioso den su bida, ku a hibele na un etapa interesante komo empresario. “Esports ta un deporte di berdat i den transkurso di añanan e industria aki lo sigui krese. Tambe mester bisa ku Esports a evolushoná di tal forma ku niun hende a kere. Drenta den e industria aki no tabata nada fasil. Pa bo ta un hungadó profeshonal di video games bo mester tin hopi dedikashon i esfuerso. Tambe bo mester ta enfoká i praktiká hopi pa por desaroyá bo mes. Esaki ta nifiká ku bo mester tin bo emoshonnan den kòntròl si bo ke logra” e ta sigui bisa.
E dos profeshonalnan aki ke hasi tur kos pa por kambia e idea robes ku tin tokante e personanan ku ta hunga video gaming. Ku miyones di persona ta hunga e weganan aki, no ta nifiká ku nan no ta biba un bida saludabel. “Biba un bida saludabel ta nos prioridat. Nos ta inspirá nos hungadonan pa nan biba salú i praktiká deporte. Tur esaki tin benefisio pa por enfoká i asina presta mihó den video gaming tambe. Nos ta enfatisá riba e benefisionan pa por tin un lifestyle balansá. Pa por logra esaki nos ta kreando un marka di lifestyle ku ta enfoká riba video gaming i tambe tempu liber” George ta kontinuá.
E tim dinámiko aki tambe ke pone Kòrsou riba mapa internashonal. Kòrsou no ta solamente e kas di Fuego, pero ta riba e isla aki a krea e promé organisashon di Esports pa loke ta trata e islanan ABC. Kòrsou tambe ta e lugá perfekto pa e bienestar di e hungadonan. “Tur esaki ta posibel den Karibe! Ku hopi orguyo nos por bisa ku nos tin hungadó di México, Repúblika Dominikana, Aruba, Boneiru, Kòrsou i Hulanda. Tempu mi tabata na México, tur hende kier a sa mas di Kòrsou. E publisista di e weganan, Riot Games a asta skohe pa graba un dokumentario na Kòrsou i asina enfoká riba mi historia. Esaki tabata un oportunidat úniko i dimes un tremendo promoshon pa nos isla” Jeff ta splika.
Fuego tin planes grandi pa futuro. E tim ta enfoká pa krese den e industria di gaming, medionan sosial i tambe den e industria di entretenimentu. “Tin asina tantu oportunidat na Kòrsou. Prome ku tur kos, nos ke krea un konekshon mas stabil entre Aruba, Boneiru, Kòrsou i Hulanda. Nos ke krea un community riba YouTube i pa loke ta trata e industria di Esports, nos ke pa Kòrsou keda propagandá komo e isla ku ta krea oportunidat. Nos ta e generashon yòn i ta nos responsabilidat pa pone nos baranka riba mapa mundial!” George ta bisa na final di e entrevista.
Si bo ta interesá pa djòin e tim dinámiko di Fuego, bo mester stima loke bo ta hasi, bo mester tin e habilidatnan adekuá i bo kontenido mester ta diferente i úniko! E tim di Fuego semper ta kla pa skucha i nan tin wowo riba tur e talentonan ku ta trahando duru pa por logra nan metanan den e industria di Esports. Keda traha duru, paso mas oportunidat lo bini riba bo kaminda. Esaki ta e meta di Fuego.
