Kòrsou, un isla chikí riba mapa mundial ta konosí di ta produsí gran hungadonan di deporte. Maske ku beisbòl ta e deporte mas famoso riba nos isla, nos por bisa ku orguyo ku Kòrsou tin algun hungado di futbòl profeshonal ta sakando kara di nos isla. Un di nan ta Roedion ‘Dion’ Henrique. Siman pasá nos tabata tin e oportunidat di hasi un entrevista ku ne, na momentu ku e tabata na Florida durante off season. ‘Dion’ (26) a nanse na Kòrsou i a muda pa Hulanda ku su mayornan ora e tabata tin 4 aña di edat. For di un edat hopi yòn, e tabata fasiná ku deporte. Manera mayoria mucha na Kòrsou, ‘Dion’ a kuminsá hunga beisbòl, pero e a kambia pa ‘American Football’ ora e a hasi 16 aña di edat.
‘American Football’ no ta un deporte popular na Hulanda, pero ‘Dion’ semper tabata wak e torneonan na televishon i pa e, esaki tabata un deporte sumamente interesante. E a kuminsá hunga ‘American Football’ komo hòbi, pero den transkurso di tempu e a kuminsa hunga na un nivel mas haltu. E a djòin e tim Amsterdam Panthers i asina e a kuminsá un kapítulo interesante den su bida.
Dor di su talento atlétiko den e posishon di ‘wide receiver’, ‘Dion’ a sa di sobresalí den su tim. “Mas mi hunga, mas mi a realisá ku mi ke subi di nivel. Komo ku e deporte aki no ta popular na Oropa, mi mester a haña un manera pa bai Merka i logra mi meta”, e ta bisa.
Ora ‘Dion’ tabata tin 17 aña, e a keda invitá pa ‘FBU All European tryouts’ i e a keda selektá pa djòin e tim di European All-Star. Despues e a haña e oportunidat pa hunga na Texas kontra prospektonan di High School. Aki e a mustra e scoutnan loke e tin aden i tres college a aserké mesora. Dor di su nashonalidat no tabata fasil pa haña e papelnan nesesario pa por risibí scholarship na Merka. Pa e motibu aki, e a bai Hulanda pa un aña pa kaba su estudionan.
Maske ku e tabata den un pais diferente, ‘Dion’ a keda pusha pa por logra su meta. E a drenta den kontakto ku Reedley Junior College na California i e por a logra drecha tur e papelnan nesesario pa por a djòin e tim. “Mi tabata tin 18 aña e tempu ei i esaki tabata un paso importante den mi karera. Mi a sali for di Oropa pa por a logra mi meta na Merka. Tabata mi soño pa hunga e deporte aki riba un nivel mas haltu i esaki tabata e prome paso!” ‘Dion ta kontinuá.
“Despues di a adaptá mi mes na Merka i tambe di a hunga tur wega na Reedley, mi a kuminsá risibí mas atenshon. Tambe tabata e momentu pa mi por a reflehá riba mi futuro. Mi kier a krese i hunga den otro tim universitario. Mi a ser ofresé un scholarship di New Mexico State i mi a realisá ku esaki tabata e fit perfekto! No ta un skol grandi, pero nan ta hunga den Division One NCAA, ku ta e nivel universitario di mas haltu” e ta splika.
“Hunga na New Mexico State tabata parse mane un bataya! Mi mester a kompetí kontra hungadonan ku mas eksperiensia. Nan tabata hunga riba e nivel aki pa sigur dos òf tres aña!” ‘Dion’ ta konta. Pero e a logré. ‘Dion’ a haña e second string i asina e por a partisipá den kasi tur wega. “Un kos ku nunka lo mi lubidá ta dia mi a hunga mi prome wega kontra University of Florida. Tabata tin 92,800 fanátiko presente i e ambiente tabata formidabel. Mi no tabata kustumbrá ku esaki. Ora nan tabata grita tabata algu espektakular” e a kontinuá ku un sonrisa riba su kara. “New Mexico a forma un gran parti di mi karera i e a siñami kon traha duru i ta semper disipliná.”
Den su último aña na New Mexico State e por a djòin Pro Day, kaminda e por a mustra su talento dilanti NFL scouts. “Mi por a mustra mi talento na timnan manera Bills, Chiefs, Ravens, Raiders i Packers. Mi resultadonan tabata bon pero komo mi no tabata tin sufisiente on-field tape/highlights dor ku mi tabata un second-string player, esaki no a benefisiami” ‘Dion’ ta splika. Despues di a kaba skol i tambe despues ku e a realisá ku e no lo risibí yamada di Pros, e a disidí di bai bèk serka su famia na Florida. Einan e a biba un aña, trahando komo entrenadó i tambe e a probechá e tempu pa traha riba su mes. “Den e tempu aki, ainda mi tabata hasi tryouts pa National Football League i Canadian Football League. Mi agente a bisami ku komo mi no tin mashá game-time highlights, esaki lo afektá e interes di e scoutnan. Pues, mi a disidí di bai Oropa bek i djòin e German Football League i traha riba mi resultadonan.”
Despues di un aña impaktante na Alemania, ‘Dion’ a keda invitá pa NFL’s International Combine. E por a demostrá su talento atrobe dilanti NFL scouts. “Esaki a pone ku mi a keda invitá pa European League of Football ku tabata algu kompletamente diferente, pero ku tambe ta un nivel mas haltu ku GFL” e ta splika. Na EFL ta kaminda ‘Dion’ ta mustrando su talento pa un aña kaba. Tambe e a kaba firma ku e tim Leipzig Kings.
Den e último 8 añanan, e tabata traha duru riba su meta. ‘Dion’ tabata biaha entre Merka i Oropa pa por hasi esaki posibel. “Ainda mi tin hopi di duna i mi lo hasi tur kos ku ta na mi alkanse pa bai e siguiente nivel, sea NFL òf CFL. Mi a pasa den eksperiensianan importante den transkurso di añanan i loke mi por bisa ta ku mi a sa di demostrá loke mi por na NCAA i NFL i timnan profeshonal. Aworaki mi meta prinsipal ta pa dominá e wega i pa mustra tur hende na Oropa ku mi no tei djies pa hunga.”
‘Dion’ ta wardando ansiosamente pa loke ta bai bini. E ta sigui disfrutá di e deporte aki i ta habrí pa kualke oportunidat nobo.
