Despues di tabata tin un tremendo presentashon na Weganan Olímpiko, tabata nesesario pa kombersá ku atleta Terrence Agard. Terrence tin 31 aña di edat, e a nanse na Kòrsou i e ta kore karedanan di 400 meter. Den Weganan Olímpiko e a forma parti di e kareda 4x400M, loke a resultá den un medaya di plata pa Hulanda. Nos tabata tin e oportunidat pa entrevistá Terrence un siman despues di Weganan Olímpiko. Maske su agènda ta poko okupá ku entrevistanan, programanan di televishon i treinmentu, nos ta sumamente agradesí ku e a logra plania un entrevista via Zoom ku nos tim di Island Sportlight.
Promé ku tur kos, kon bo ta sinti di a gana un medaya di plata na bo promé Weganan Olímpiko?
“E sentimentu aki ta algu ku mi no por splika. For di tempu ku mi tabata mucha, mi tabata soña pa por a partisipá na Weganan Olímpiko. Den mi karera a pasa sierto kosnan ku a ponemi kanselá mi partisipashon na Weganan Olímpiko di 2012 i 2016. Mi a sufri leshonnan ku a pone mi hala atras for di deporte. Despues di a pasa tantu kos i ku finalmente mi a logra partisipá tòg e aña aki i alabes gana un medaya, ta algu ku mi ta hopi orguyoso di dje. Esaki ta un logro ku semper mi lo karga ku ne pa restu di mi bida.”
Ki tempu bo a kuminsá ku korementu?
“Mi a kuminsá kore ora mi tabata tin 9 aña. Mi a kompetí na varios kompetensia lokal (na Kòrsou) i internashonal. Mi a gana mayoria di e kompetensianan aki loke a pone ku mi a ser di scout. Mi a kuminsá tuma e deporte mas na serio. Na 2014, ora mi tabata tin 24 aña mi a bai biba Hulanda.”
Na 2015 bo tabata embolbí den un aksidente basta serio. Bo por konta nos mas di esaki?
“Promé ku e aksidente aki, mi tabata embolbí den un otro aksidente na ougùstùs 2011 kaminda mi a pèrde un dede i mi a keda 8 luna sin por hasi nada. Pa motibu di esaki mi no por a partisipá den Weganan Olímpiko na 2012. Despues, na 2015, mi tabata enbolbí den otro aksidente di outo na Hulanda. Mi a kibra mi nèk i na 2016 tampoko mi por a partisipá na Weganan Olímpiko. Mi mester a bisti un neckbrace pa 3 luna i nan a bisami ku nunka mas mi por kore. Esaki tabata un momentu hopi duru pa mi. Mi a haña atake di pániko, depreshon i mi a sinti ku mi kier a laga tur kos. Mi no tabata kere den mi mes mas.”
Kiko a yudabo sali for di e situashon aki?
“Tres luna despues di e aksidente mi a bai Kòrsou pa pasa tempu ku mi famia. Mi kier a stòp di praktiká e deporte i mi no kier a hasi nada mas. Mi ta kòrda mi famia tabata keda motivami pa mi sigui pusha. Nan a bisami ku nan ta kere den mi i mi no mag laga bai. Esaki a dal mi, paso danki na nan, mi a sigui pusha pa dilanti. Otro bendishon ta ku e reabilitashon a bai mas lihé ku loke a spera. Mi por bisa ku ta na Kòrsou, hañando sosten di mi famia, landa tur dia pa lòs e spirnan i ta den kalor, sigur a laga e proseso kana mas lihe. Mi a asta kuminsá kana mas lihe ku a spera. Na febrüari 2016 mi a kuminsá bishitá SDK (Sentro Deportivo Kòrsou) djies pa kana algun rònchi. Poko poko mi a haña forsa i mi a kuminsá jòg. Aki mi a realisá ku tin speransa i ku ainda mi por kompetí den e deporte ku tantu mi stima. Den april mi a bai kompetí na Merka i den yüli mi a kompetí na e Kampionato Oropeo na Amsterdam.”
Despues ku tabata tin asina hopi insertidumbre si Weganan Olímpiko ta bai tuma lugá òf no, kon bo a prepará bo mes pa bo promé Weganan Olímpiko?
“Aproksimadamente ocho luna promé ku e Weganan Olímpiko, nos a ser notifiká pa IOC ku tur kos ta sigui kana normal. Maske tabata tin hopi rumor ku nan lo ser kanselá, ami a keda enfoká riba loke IOC a informá. Si IOC bisa ku tur kos ta sigui, ta paso tur kos ta sigui. Mi mester a wak pa ami ta kla pe. Na 2012 i na 2016 mi no por a bai, pues mi meta awor tabata enfoká riba Tokyo. Nada por a wantami. Ta ami ku mi pensamentu positivo.”
Kon tabata e eksperiensia na Weganan Olímpiko pa loke ta trata restrikshonnan pa Covid?
“E reglanan tabata hopi severo. Pa por a drenta Hapon, nos mester a yena masha hopi formulario i tambe mester a hasi varios tèst. Na Tokyo nos mester a keda den un ‘bubble’ ku ta manera un akomodashon, kaminda bo mag keda solamente ora ta bai kompetí. Pues si bo kompetensia ta dura 5 dia, bo mag keda einan solamente e dianan ei te ora e kompetensia pasa. Despues bo mester sali. Den prome instante nos a keda dos siman den un siudat pafo di Tokyo pa kustumbrá ku e klima i training. Ora tabata e momentu pa kompetí nos a bai Tokyo i djòin e otro atletanan den e bubble. Den e bubble no tabata tin mag di sali for di kamber sin ningun motibu. Ora bo mester sali, bo ta sali akompañá dor di un empleado. Tabata parse ku nos tabata den un mundu di robot. Nos no tabata tin e oportunidat pa keiru ni pa wak otro kompetensianan. Nos a pasa dia na hotèl i riba vèlt. Esei so.”
Bo a kompetí riba e nivel di mas haltu. Kiko ta bo pensamentunan promé ku e kareda? Bo a kere ku bo lo tabata tin un prestashon asina?
“Lógikamente e pensamentu ta pa semper ta konsentrá riba e meta i pa tur ora ta e mihó vershon di mi mes. Honestamente, nos meta tabata pa yega final. Ora nos a yega final, nos tabata tin Liemarvin ku tabata fit atrobe dor ku e a kore par di kareda prome. Prome ku e final, mi a hasi algun kalkulashon pa wak ki chèns nos por tin. Dor di wak nos tempunan, nos por a logra e medaya di plata pero na mes momentu nos por a yega na di 6 lugá. Tur pais tabata tin bon punto, pues tur kos por a pasa. Na final di dia nos mester a duna 110% ku a resultá den un kareda mas lihé ku nos a spera. Nos a kibra e rèkert nashonal hulandes ku 5 sekònde!”
Ora bo wak bèk na tur loke bo a logra, kon bo ta sinti bo?
“Emoshoná, hopi emoshoná! Despues di a pasa den tantu momentu difísil, mi por wak bèk i bisa ku tur e problemanan ei tabata bale la pena. Un gran sensashon e kos aki ta! Mi ta kòrda ku na final di e kareda, mi a kai na rudia i mi a kuminsá yora paso mi mester a saka tur mi emoshonnan. Mi a keda kòrda e momentunan ora mi kier a stòp ku tur kos i ora mi a wak mi nòmber riba e bòrchi komo e persona ku a sali na di dos lugá, mi a bira mas emoshoná. E momentunan duru a hasimi e persona ku mi ta awe. Mi ta agradesido.”
Maske bo a kore bou di bandera hulandes, bo a representá Kòrsou tambe, huntu ku 5 atleta mas di nos isla. Kon esaki a sinti?
“Tabata hopi impreshonante pa a representá nos isla riba un nivel asina haltu. Nos tim tabata hopi uní i nos tur tabata apoyá otro. Mi tabata trein basta tempu kaba ku Liemarvin i tambe ku Angela. Ta asina dushi ora bo ta traha den un tim kaminda tur hende ta apoyá otro i ta enfoká pa por krese huntu i tambe pa por mehorá tur dia di nobo. Nos a krea un ambiente masha dushi. Durante e kareda bo por a mira ku nos a duna 100% di nos mes i nos tabata felis ta brasa otro. Nos sa kon duru nos a traha i kuantu nos tabata anhelá pa e momentu aki. Mi ta hopi orguyoso di por a forma parti di e tim aki. Mi a siña asina hopi di kada un di nan. Mi ta spera ku e grupo por keda asina uní ku otro i kuna 2024 nos por logra e medaya di oro. Tambe ta importante pa mustra kon Hulanda i Kòrsou por uni. Ora bo kombiná Kòrsou i Hulanda den deporte, bo por logra kosnan grandi pa tur dos país. Kòrsou tin hopi talento i huntu nos por krea kosnan interesante.”
E legendario Churandy Martina tambe a forma parti di bo tim. Kiko esaki a nifiká pa bo?
“Churandy definitvamente tin gran influensia riba nos. E a duna nos konseho balioso, manera kon mester afrontá sierto momentunan. Esaki sigur ta yuda ora bo ta presta riba nivel haltu. Churandy a logra hopi i nos ku ta e generashon mas yòn, ta konsideré komo un persona ku a habri porta pa nos. Nos ke logra mesun tantu ku ne. Tabata great di por a kompartí ku ne, spesialmente den su último Weganan Olímpiko.”
Kiko ta bo plannan pa futuro?
“Ainda nos ta den e periodo pa kore, te ku mei mei di sèptèmber. Mi tin 2 pa 3 kompetensia mas pa bai. Despues di esei nos tin un fakansi kòrtiku i den òktober nos lo kuminsá bèk ku training i prepará nos mes pa loke ta bini. Ta bai tin kompetensia febrüari/mart. Nos meta ta pa yega World Championships na Merka otro aña. Tambe dimes e klasifikashon pa Weganan Olímpiko na Paris na 2024. Ban spera e biaha aki nos por trese e medaya di oro kas! Esei sigur ta mi meta!”
