Deporte semper a forma parti di nos kultura. Kòrsou ta bendishoná ku talentonan yòn ku ta poniendo nos isla riba mapa mundial. Hopi di e atletanan aki a kuminsá hasi deporte for di mucha. Na Kòrsou beisbol i futbol ta e deportenan ku mas akogida i ta mas popular den e hobennan. Ora un mucha siña hunga e deporte, ta mas ku simplemente siña e téknikanan ku e deporte ta trese ku ne. Deporte ta yuda e mucha desaroyá su mes positivamente i tambe pa e siña atendé ku partinan bon i menos bon di bida. Na momentu ku e mucha ta krese, e por disidí si e ke logra yega un nivel profeshonal òf si e ke lagé komo un hòbi. Island Sportlight tabata tin un entrevista ku Junior Martina ku a konosé un desaroyo interesante den deporte. For di chikí e tabata fasiná ku futbol pero den transkurso di añanan e a haña pashon pa beisbol. Bueltanan di bida!
Junior Martina a nanse na Kòrsou pero ora e tabata tin 1 aña di edat, e a muda bai Hulanda ku su mayornan. Junior su mama ta di Sint Vincent i su tata ta Yu di Kòrsou. Su mama a bai biba Kòrsou ora e tabata hoben i despues e a bin topa ku Junior su tata. Aktualmente Junior tin 23 aña di edat i e a biba gran parti di su hubentut na Hulanda. “Ora nos a muda pa Hulanda, nos no a bai bèk Kòrsou. Pa mi ta sinsero, mi no tabata sa hopi di e isla, paso mi a krese na Hulanda”, Junior ta bisa na komienso di e entrevista.
“Mi a kuminsá hunga futbol den bario ku mi amigunan. Futbol ta e deporte mas famoso na Hulanda. Mester bisa ku na Hulanda beisbol no ta masha popular. Ora mi a kuminsá bira mas grandi, mi a bin sera amistat ku un amigo di Aruba ku tabata biba den mi bario. Asina mi a ser introdusí na beisbol. Su tata tabata coach di un team i mi a disidí di djòin” e ta splika.
Na un edat hoben, Junior tabata disfrutá masha di hunga futbol òf beisbol den bario ku su amigunan. “Ora mi tabata tin 10 aña, mi a kuminsá disfrutá di beisbol. Mi a bin stima e deporte aki i mi kier a hibe na un nivel mas profeshonal. Mi a disidí di stòp di hunga futbol i ta enfoká totalmente riba beisbol” e ta sigui splika.
Ora Junior a kuminsá krese, e a kuminsá bishitá Kòrsou atrobe. E a bin den kontakto ku diferente coach di beisbol i e a ser invitá pa partisipá na diferente tryouts ku diferente scouts di diferente high school i college. “Ora mi a ser invitá pa bai Kòrsou pa partisipá den e tryouts, mi a bin kuminsá konosé mi isla tambe. Bai e pais kaminda mi a nanse i siña mas di mi deporte ta simplemente algu masha spesial” Junior ta bisa.
Na un di e tryouts, su bida a dal un buèlta masha interesante. Un team di high school a aserké ku un oferta. Esaki tabata e prome paso importante pa e por traha riba su metanan, di bira un hungadó di beisbol profeshonal. Tin asina hopi hungadó di beisbol ku ke logra e meta ei, pero mester pusha i traha duru pa por logra esaki. Junior tabata sa esaki for di kuminsamentu i e tabata kla pa tuma e pasonan nesesario pa por hasi su soño realidat. E mihó manera pa logra esaki ta di bishitá Kòrsou i ser rekonosé pa e scouts i asina logra e transishon di Hulanda pa Merka.
Na 2017 e a bishitá un high school na Oklahoma, kaminda e a keda 6 luna i e a hunga 4-5 wega. Despues di a gradua na high school, e a bai Junior College na Western Oklahoma State. “Mi a kustumbrá hopi lihé ku e bida na Merka. E siudat tabata hopi ketu i mi por tabata hopi enfoká riba e deporte. Hungando beisbol na Junior College a siñami pa traha duru i pusha pa dilanti. Trabou duru i disiplina ta paga semper. Manera mi a bisa anteriormente, beisbol no ta mashá popular na Hulanda i pa hopi hende e ta djies un hòbi. Ora mi a yega Merka, ta un mundu kompletamente diferenre. Tur hungadó ke firma un kontrato ku un team profeshonal. Si bo tin un meta, keremi, bo ta logra ku sakrifisio, trabou duru i dedikashon. Mi enfoke tabata pa hiba beisbol na un nivel mas haltu i mi a traha duru pa logra esaki” e ta bisa.
Despues di a hunga dos tenporada den Junior College, Junior a hala atenshon di diferente team di MLB. “Mi coach a bisami ku tin diferente team ku ta interesá pa traha ku mi i ku mi tin un oportunidat grandi pa get drafted” Junior ta sigui splika. Den round 16 di MLB draft 2019, Washington Nationals a bisa su nòmber. Ora nos a puntré kiko e a sinti e momentu ei, e a bisa lo siguiente:”pa mi ta honesto, mi no tabata sorprendí. Nan a bisami kaba ku nan lo yamami, pues mi no a sinti mashá emoshon. Dimes mi tabata hopi kontentu ku e logro aki, pero mi famianan tabata na Hulanda tambe, pues mi no tabata tin nan serka pa por selebrá. Tur esei ta hunga un ròl. Esaki ta djies dunami mas empuhe pa sigui lucha pa por yega Major Leagues!”
Hunga beisbol den Minor Leagues por ta hopi duru. E poder di bo mente ta sumamente importante pa por bira eksitoso. “Awor mi a kaba 2 season. Den 2019 mi tabata forma parti di Low A team i mi a hunga e short season. Esaki tabata un season pa siña i tambe adaptá mi mes na pro ball” Junior ta bisa. Na 2020 e season a ser kanselá dor di e pandemia. Pa hopi hungadó tabata un off season hopi largu, sin sa kiko ta bai pasa den futuro.” Ami tabata na Kòrsou kasi henter e off season i mi no a hunga masha wega. Mi tabata keda train si i prepará mi mes pa loke ta bai bini. Despues di algun luna di insertidumbre nan a bisa nos ku den 2021 nos por hunga atrobe.”
Junior a risibí un yamada pa djòin High A den team full season. Esaki kiermen ku e por hunga dos biaha mas tantu e kantidat di wega ku e tabata hunga den su prome season den 2019. “2021 tabata un tremendo aña pa mi. Mi a siña hopi i tambe mi a sinti kiko kiermen pa hunga tur dia. No ta fasil. Mi a distansiá mi mes for di tur kos i ta kompletamente enfoká riba mi karera den beisbol. Mi komienso den e season no tabata dje bon ei, pero manera e weganan a sigui, mi a mehorá. Tur esaki ta posibel dor di e poder di mente. Ku un dia no a bai bon, no ta nifiká ku sobrá dia ta bai malu. Mester keda positivo!” e ta sigui bisa.
Despues ku e a finalisá e season positivamente i ku bon krítika di su coachnan, Junior a ser yamá pa djòin e team nashonal di Hulanda pa Kampionato Oropeo ku a tuma lugá na Italia. Nan a bira kampion! Despues di e gran logro aki, e a partisipá ku team U23 di Hulanda na México pa Kopa Mundial, unda nan a keda na di 10 lugá. “Bo mes por imaginabo kon kansá mi ta aworaki, pero na final di dia, ami no ta keha. Beisbol ta mi pashon i mi ta hasi lo nesesario pa sigui krese” Junior ta splika.
Aktualmente ta off season i Junior ta tumando un tempu liber pa pasa ku su famianan na Hulanda. Tambe e ta sigui train. “Mi coachnan a bisami ku nan ke mi bira utility infielder i pa mi sigui traha riba e power of offense. Mi a haña hon reakshon di mi coachnan, pues esaki a dunami un empuhe pa sigui pusha i pa un dia mi yega Major Leagues!”
